Þetta finnst mér ósmekkleg frétt

Erum við ekki nógu djúpt sokkin svo við séum ekki að flytja svona sóðalegar klámfréttir á veraldarvefnum?  Hvurjum er ekki sama þó svo að útlendingar geti ekki eðlað sig með náttúrulegum hætti og fjölgað þannig mannkyninu?

Í minni sveit tíðkast ekki að hafa svona máli í flimtingum, eða básúna þessum hlutum um allar koppagrundir.  Í okkar heimabyggð eðlar fólk sig til að búa til fleiri hendur til að draga björg í bú, ekki til dægrastyttingar eða óþurftar.  Og þaðan af síður valsar fólk inn í einhvurs konar verslanir og velur sér hráefni til barnagerðar eins og um kökubakstur sé að ræða.

Mér finnst svona fréttir ekki eiga heima á Nýja Íslandi.  Við þurfum að skrúbba rækilega til siðferði okkar og móralska réttsýni, og útrýma hverslags klámi og viðbjóði sem þessum.  

Að því sögðu má svo sem alveg taka undir sumar raddir sem heyrst hafa að hér sé komin fyrirtaks útflutningsleið fyrir Nýja Ísland.  Nú er viðbúið að dragbítarnir og liðleskjurnar í samfélaginu hrökklist til útlanda og eftir standi harðgerður kynstofn gegnheilla Framsóknarmanna, og sem slíkir erum við að sjálfsögðu tilvaldir til undaneldis.  Kannski er kominn tími á að við Framsóknarmenn hættum að halda okkar sterku genum innan fjölskyldunnar og hyggja á útrás.  

Í minni sveit hafa menn í gegnum tíðina verið boðnir og búnir til að leggja hver öðrum lið og rétta hjálparhönd þegar á hefur reynt í málum sem þessum, og ekkert feimnismál.  Opinská umræða, fordómalaus og upplýsandi er það sem er þörf er á um þessar mundir og þar má byggja á langri hefð okkar sveitamannanna sem og opinskáu hugarfari og víðsýni til að bjarga breska kynstofninum frá glötun, og jafnvel betrumbæta hann eilítið með exótískri blöndu af Framsóknarlitningum.

En umræða sem þessi á samt engan rétt á sér í siðuðu samfélagi og mín ráð til þeirra bresku karla og kvenna sem ekki hafa pípulagnirnar í lagi er að vera ekki að bera sinn aumingjaskap á torg og koma betlandi til okkar Íslendinga um að fá gefins aðgang að okkar stórkostlega genamengi.  Þeir geta borgað fyrir slíkt eins og við hin.

Sæðisgjafa skortir í Bretlandi

Frábær frétt

Meira svona!  Við höfum gott af því að rifja upp hvað allir voru blindir og vitlausir í fyrra.  Hahahaha... ég skoðaði nokkrar gamlar auglýsingar.  Við verðum öll betri manneskjur við það að gera grín að þessum bankamönnum sem ekkert vita og ekkert kunna.  Þvílíkir aumingjar, eins og við segjum í sveitinni.  Ég tek undir þessa tillögu blaðamannsins, skikkum alla Íslendinga til að horfa á svona og gera grín að bankafólkinu.  Það á það skilið.

Bankamenn á flótta

Heyr, heyr. Óþarfa hnútukast í þessa tvo

Kann fólk enga mannasiði?  Hvað er fólk úti í bæ að hafa skoðanir á því hverjir stjórna landinu og hverjir ekki?  Ég veit ekki betur en að Gylfi hafi fengið að kjósa 2007 eins og aðrir og fái að kjósa aftur 2011, og getur hann ekki haldið sig á mottunni þess á milli?  Hann er ekki að hjálpa einum eða neinum með því að rjúka svona fram með rugl sem hann hefur ekkert umboð til að halda fram.

Árni og Björgvin hafa ekki gert neitt rangt í sinni valdatíð.  Undirmenn þeirra hafa gert mörg mistök, því miður, og skrifast það á stjórnvöld og þá ráðherra sem stýra stofnunum þeim sem þeir starfa hjá, en Árni og Björgvin eru saklausir af öllu.  

Árni er gríðarlega upptekinn um þessar mundir og sést því lítið, ég veit það fyrir víst.  Hann vinnur sinn fulla vinnudag og hefur lítinn tíma til að baða sig í ljósi athyglinnar og fjölmiðla, enda er það ekki staður fyrir ráðherra á erfiðleikatímum.  Þeir eiga að vera í sinni vinnu, með sínum starfsmönnum og ekki á blaðamannafundum hist og her.

Björgvin er líka upptekinn og hefur í nógu að snúast að vera í sviðsljósinu og á blaðamannafundum.  Það er sjaldan mikilvægara en akkúrat núna að ráðherra, á þessum erfiðleikatímum, sé sýnilegur og í fjölmiðlum, með blaðamannafundi og viðlíka, og segi sína skoðun á mönnum og málefnum.  Það gerir Björgvin.

Björgvin er uppfullur af hugmyndum, sumir myndu segja að hann væri að springa af hugmyndum um hvernig best sé að ráða bug á vandanum.  Hann vill t.d. skipa nefndir.  Sem er alltaf góð leið til að leiða mál til lykta.  Hann sýnir líka þá fyrirhyggju að vera ekki að ræða endilega allar sínar hugmyndir við embættismenn og samflokksmenn sína, enda gæti slíkt tafið fyrir, heldur rýkur með þær beint í grasrótina um leið og þær fljúga honum í hug.  Virkt almenningslýðræði þar!

Það er klárt að hinir og þessir embættismenn innan stjórnsýslunnar hafa gert mistök.  Þær stofnanir þarf að skoða sérstaklega og ráðherrar sem fara með t.d. bankamál og efnahagsmál eiga skilyrðislaust að segja af sér vegna þeirra mistaka sem undirmenn þeirra hafa gert.  En að veitast að Árna og Björgvin með þessum hætti stoðar ekkert.  Þar er bara verið að persónugera vandann og skella skuldinni á ráðherra sem bera enga ábyrgð á þessum afglöpum.  Ég hvet Árna og Björgvin til að sitja sem fastast og láta ekki öfundarraddir smáborgaranna slá sig út af laginu.  Þeir eiga að halda áfram sinni gæðavinnu og láta æðstu yfirmenn þeirra stofnana sem helst hafa verið gagnrýndar taka pokann sinn. 

Vegið ómaklega að ráðherrum

Eiríkur kemur landinu til varnar!

Eiríkur er drengur góður, líklegast besti og mesti fræðimaður Íslands fyrr og síðar.  Ég átti samtal við sveitunga minn í heita pottinum í morgun sem var mér ekki sammála.  Hann sagði að hann hreinlega skyldi ekki hvað Eiríkur gæti "pjakkast" mikið í þessu ESB dæmi, hversu mikil ESB-klappstýra hann væri þegar ESB er í óðaönn að bregða fyrir okkur fæti hvar sem færi gefst.  Ég er bara ekki sammála því.  Hann sagði líka að það væri með ólíkindum að Eiríkur, og fleiri, vildu hlaupa inn í ESB hugsunarlaust þegar ljóst er að við búum eingöngu við óvild margra ríkja þar inni.  Samningstaða okkar næstu árin er vonlaus og það myndu allir við samningaborðið vita að við hefðum á milli aðildar og gjaldþrots að velja, og því gætum við ekki gert neinar kröfur.   Ég er ekki sammála því.  Við erum besta þjóð í heimi sem á í smávegis lausafjárskort að etja í augnablikinu.  Það myndi aldrei hvarfla að Bretum eða Þjóðverjum að notfæra sér bága stöðu okkar næstu áratugina til að ná fram ósanngjörnum kröfum í aðildarviðræðum okkar við ESB.

Ég er t.d. viss um að ef við færum til ESB og bæðum náðsamlegast um að fá að ganga þar inn, helst strax, en við vildum ekki opna fiskimiðin, ekki opna fyrir virkjanakostina, ekki taka á móti óhóflega mörgum útlendingum, en fá meira úr sjóðum ESB á meðan við náum okkur á strik, þá yrði því vel tekið.  Eiríkur veit þetta.  Það stafar engin ógn af ESB, þjóðirnar þar eru ekkert nema velvildin í garð okkar og myndu aldrei, aldrei beita okkur þvingunum í nauðasamningum.  Aldrei, segi ég.  Þess vegna hafna ég alfarið og algerlega þessari gagnrýni sveitunga míns í morgun.   

Segir Breta hafa yfirtekið ábyrgðir

Af hverju mínar hugmyndir eru bestar

Ég er búinn að hugsa þetta soldið.  Auðvitað á að kjósa og það strax.  Annað er einfaldlega ekki möguleiki í stöðunni.  Það er mín skoðun, og ég er viss um að ég hef ekki ranga skoðun eða vitlausa skoðun (því þá myndi ég skipta um skoðun, ekki satt).  Og þess vegna er sú skoðun sem ég hef sú besta sem hægt er að hafa hverju sinni, og þar af leiðandi besta skoðun fyrir þjóðina.  Ef þjóðin er ekki sammála mér, þá hefur hún einfaldlega rangt fyrir sér og þá þarf styrka hönd til að leiða hana á rétta braut. 

Bjarni er bakarinn sem hengdur var fyrir smiðinn, því miður.  Þar fer framsýnn og nútímalegur Framsóknarmaður sem hefur skýra sýn til framtíðar.  Nú verðum við Íslendingar að stóla á Guðna einan í þeirri sókn sem við þurfum að blása til.  Guðni á að sjá um að koma landinu úr þeim ógöngum sem við erum í, t.d. með því að stórefla landbúnað og sjávarútveg, og samræma þjóðina til velferðar.  Aðrir flokkar eru ófærir um slíkt.

Mínar tillögur eru t.d. þær að skipuð verði Ákvarðanatökustofnun Ríkisins þar sem fólk getur fengið leyfi og leiðbeiningar frá hinu opinbera um ýmis mikilvæg málefni, s.s húsnæðiskaup, menntun, barneignir og annað slíkt.  Tekið verði tillit til stöðu og búsetu, og þannig tryggt að fólk sé ekki að mennta sig til einhvers óþarfa, kaupa hluti sem það hefur ekkert með að gera (og skapa þannig bruðl í kerfinu og auka ójöfnuð), og eignist börn í samræmi við getu ríkissjóðs hverju sinni til að greiða barnabætur og fæðingarorlof.  Allt saman hlutir sem þarf að koma undir eina stjórn til að tryggja hér stöðugleika.

Landbúnaðurinn er stórlega vannýtt grein á Íslandi, ég legg til að fólk verði flutt í sveitir landsins og fái þar vinnu á ríkisreknum jörðum við að skapa matarforða í kistur landsmanna.  Að launum fær fólk húsaskjól og hluta af uppskeru til að sjá sér og sínum farborða.  Á þann hátt fær stór hluti landsmanna að njóta dýrðlegrar búsetu í fegurstu sveitum landsins og kemst í tengsl við rætur sínar og arfleifð.  Sama gildir um sjávarplássinn, við þurfum ríkisútgerðir sem ráða til sín sjómenn sem svo fá húsaskjól og aflahlutdeild í skiptum fyrir vinnu sína.  Þannig komumst við í tengsl við okkur sjálf, landið, miðin, og söguna.

Við þurfum að koma í veg fyrir bruðl og óþarfa sem gerir ekkert annað en að auka á eymd þjóðarinnar og er uppspretta þeirra vandamála sem við nú glímum við.  Fólk þarf ekki 2 bíla á heimili, mörg sjónvörp, nýmóðins innréttingar, eða mörg pör af skóm.  Þegar ég var ungur var ekki til bíll á heimilinu, aðeins eitt sjónvarp sem horft var á 2 daga í viku, og ég átti bara eitt par af hvunndagsskóm og eina spariskó.  Ég var ánægður og þurfti ekki meira.  Af hverju þurfa aðrir landsmenn eitthvað umfram þetta til að lifa góðu lífi?

Nei, nú er nóg komið, við þurfum að hætta að leita að sökudólgum og benda á aðra en okkur sjálf.  Við þurfum að taka til hendinni og standa saman.  Hverfa til grunngildanna, til sögunnar.  Til sveitanna og sjávarins.  En umfram allt að finna þá sem bera ábyrgð á því hvernig komið er og draga til ábyrgðar.

Guðni: Bjarni axlar ábyrgð

Stormur í vatnsglasi!

Bjarni Harðarson, einn ötullasti, skynsamasti, og duglegasti þingmaður sem þjóðin hefur átt er gerður að blóraböggli í þessu máli.  Bjarni vildi að þetta bréf yrði sent nafnlaust, svo ekki yrði það tengt við hann og það eitt og sér sýnir ábyrgð af hans hálfu, mér finnst ótækt að refsa honum fyrir slíka fyrirhyggju og ábyrgðartilfinningu.

Inn á við hefði Bjarni virkað sem sterkur hluti af liðinu, staðið á bak við samþingmann sinn, um það efast ég ekki.  

Í hinni endalausu leit að blórabögglum um þessar mundir er það grætilegt að kraftmikill þingmaður Framsóknar, eina flokksins sem er vammlaus með öllu og ber á engan hátt ábyrgð á einu eða neinu í því sem komið er í ljós, skuli vera neyddur með þessum hætti til afsagnar.  Fyrir smámuni eina.

Hvernig væri að þingmenn Samfylkingar myndu segja af sér vegna þeirrar gríðarlegu ábyrgðar sem þeir bera á ástandi þjóðfélagsins í dag?  

Nú sem aldrei fyrr þurfa landsmenn sem bera hag sjávar og sveita fyrir brjósti að þjappa sér þétt saman um sinn flokk og fordæma þessar nornaveiðar, þessa botnlausu leit að sökudólgum.  Hún skilar engu öðru en því að saklausir falla í valinn.  Í stað þess að leita að sökudólgum væri nær að leita uppi þá sem ábyrgð bera á ástandinu og refsa þeim grimmilega, hneppa í varðhald ef ekki vill betur. 

Bjarni segir af sér

Látum ráðherrana í friði, hættum að trufla framkvæmdavaldið

Það er ótrúlegt hvað menn geta atast mikið í ráðherrunum.  Er virkilega hægt að ætlast til þess að ráðherrar viti um alla hluti sem fara fram í ráðuneytum þeirra?  Ég held nú síður.  Þetta eru menn sem eru uppteknir og á fundum daginn út og inn, og það er einfaldlega ekki hægt að ætlast til þess að þeir séu alltaf með puttana á púlsinum. 

Björgvin og Árni hafa nóg á sinni könnu svo þeir séu ekki að vasast í því sem undirmenn þeirra eru að gera, og bera örugglega fulla ábyrgð á.  Ef Árni vissi ekki af þessu með Icesave, þá er það bara svo.  Enginn skaði skeður.  Það ætlast enginn til þess að ráðherrar séu allt í öllu og beri ábyrgð á sínum málaflokkum.  Þeir gera eins og þeir geta.  Og svo verðum við líka að virða þeim það til tekna að þeir eru, Árni og Björgvin altsvo, dýralæknir og heimspekingur.  Og sem slíkir geta þeir ekki skilið endilega alla þá flóknu hluti sem fara fram í þjóðfélaginu.

Nú er tvennt sem við þurfum að gera.  Standa þétt að stjórnvöldum og draga öll í sama átt.  Hætta að leita að sökudólgum og virkja reiðina!  Hitt sem við þurfum að gera er að efna strax til kosninga og velja nýja leiðtoga.  Uppgjör þarf að fara fram hið fyrsta og draga þarf hina seku til ábyrgðar, eigi síðar en strax!  

Klárlega er eini flokkurinn í landinu með óflekkað mannorð og reynsluna til að leiða okkur inn í framtíðina Framsókn.  Samfylkingin og Sjálfstæðisflokkurinn bera alfarið og eingöngu ábyrgð á ástandinu eins og það er núna, Vinstri Grænir eru óábyrgir í málflutningi og sífellt í mótsögn við sjálfa sig.  Hver man ekki eftir því þegar helsta baráttumál þess flokks var að klæða hvítvoðunga í ókynbundna liti?  Frjálslyndir eru uppteknir af því að hafa Ísland fyrir Íslendinga, og kvóta.  Eftir standa Framsóknarmenn, sverð og skjöldur þjóðarinnar.

Við í Framsókn skiljum vel þá ábyrgð sem felst í því að vera ráðherra, og hversu vel menn þurfa að vera að sér í sínum málaflokkum.   Sérþekking og fullkomin ábyrgð er það sem kallað er eftir í góðum ráðherra.  Það færum við til málanna í hinu Nýja-Íslandi.

Ráðherrarnir koma af fjöllum

Fjölmiðlar á Íslandi - hvað er til ráða?

Foringi minn og leiðtogi, Guðni Ágústsson, hafði mikið til síns máls um daginn.  Ástandið á fjölmiðlamarkaði er æði erfitt og nú þarf að grípa inn í.  Tillagan um að ríkið myndi kaupa upp fjölmiðla landsins og útdeila aftur á lýðræðislegan hátt er það eina sem getur bjargað okkur núna.  Tryggja þarf sjálfstæði fjölmiðla og ritstjórnarlegt frelsi þeirra.

 

Því legg ég til að  ríkið leysi til sín alla fjölmiðla landsins, að RÚV undanskildu, þjóðnýti ef ekki vill betur.  Síðan verði fjölmiðlunum skipt upp á milli stjórnmálaflokkanna þannig að tryggt verði að allar skoðanir nái fram að ganga.  Það fyrirkomulag þegar við vorum með Morgunblaðið, Þjóðviljann, Alþýðublaði og Tímann var mjög gott og virkaði best í lýðræðislegri umræðu.  Ég sé ekkert því til fyrirstöðu að fjölmiðlum verði skipt jafnt niður á flokkana og bann lagt við stofnun annara miðla upp frá því.  Slíkt myndi tryggja lýðræðið og málfrelsið.  Hver flokkur fengi eitt dagblað, eina útvarpsrás og eina sjónvarpsrás til ráðstöfunar, greitt fyrir af ríkinu.  Og svo væri RÚV áfram rekinn sem ríkismiðill, en skorið niður ruslið sem boðið hefur verið upp á (t.d. með því að sýna eingöngu norrænt menningarefni og innlenda dagskrárgerð).  

Ég held að þetta sé besta lausnin fyrir alla, lýðræðið yrði tryggt og við fengjum menningarlega umræðu um málefni líðandi stundar. 

Framtíðarsýn í greiðslustöðvun

Ekki hægt að ætlast til þess

Nú er Bleik brugðið.  Hvernig er hægt að saka ráðherra um að hafa gert mistök?  Eru ráðherrar ábyrgir fyrir ÖLLU sem þeir eiga að hafa umsjón með?  Jújú, ráðherra er yfirmaður FME, en FME klikkaði þarna að koma þessu ekki til skila til Björgvins að hann skyldi það og vissi um. 

Það er ekki hægt að ætlast til þess að ráðherrar viti af öllu svona löguðu, þeir eru uppteknir menn sem hafa í mörg horn að líta, og ómögulegt fyrir þá að vita af öllu.  Þess vegna er ekki hægt að draga þá til ábyrgðar þegar eitthvað klikkar.  Undirmennirnir bera alla ábyrgð, það er klárt.

Annars er Björgvin búinn að lyfta grettistaki, maður sér hversu lítið hann kann í viðskiptum og viðlíka, og miðað við það sýnir hann frábæra takta sem yfirmaður allra viðskipta og bankamála í landinu.  Það er ekki hver sem er sem getur stýrt svona batteríi í gegnum svona ólgusjó án þess að hafa vit á málaflokkunum.  En Björgvin tekst það.

Annars finnst mér að við ættum að fá inn Framsóknarmanninn Jón Baldvin til að leiða þjóðina, hann er eins og ferskur vindur í umræðuna, með nýstárlegar skoðanir og hugmyndaríkar lausnir. 

 

FME: Upplýsti ekki ráðherra

Og þess vegna þarf rétta flokka til að stýra ferlinu

Og sá flokkur er Framsókn.  Ekki spurning.  Enginn flokkur hefur unnið af eins miklum heilindum fyrir land og þjóð í gegnum árin og Framsókn og til að tryggja að spilling grafi ekki um sig á komandi árum þarf Framsókn að stýra ferlinu.

Við þurfum að tryggja það að t.d. ríkisbankarnir verði áfram í eigu hins opinbera til að tryggja að peningar flæði ekki til fólks sem við þekkjum ekki og gæti notað þá í eitthvað sem nýtist ekki þjóðinni.  Það þarf að tryggja að þeir sem fá að njóta kerfisins í framtíðinni muni skila sínu til ríkisins og landsins, og þá þarf að hafa sterkan flokk við völd sem getur valið réttu aðilana, vammlausa og dugmikla.

Svo þarf að sjálfsögðu að einkavæða ríkisbankana sem fyrst því það er óhugsandi að ríkið sjái um rekstur banka í vestrænu ríki.  Þá þarf að sjálfsögðu að ganga svo um hnútana að þeir sem við þeim taka séu aðilar sem við þekkjum og treystum, það væri fátt verra en að ríkið léti bankana í hendur aðila sem það ekki þekkir.

Hér skiptir því höfuðmáli að hafa sterka og skýra stefnu.  Bankana áfram í rikiseigu til að tryggja að þeir séu nýtti í þágu þjóðarinnar.  Annað væri glapræði.  Og í annan stað þarf að tryggja að þegar einkavæðingin fer fram, sem þarf að gerast fljótt, þá fari bankarnir til traustra aðila sem muni gæta hagsmuna þjóðar til sjávar og sveita.  

Kjörumhverfi fyrir spillingu