Og þess vegna þarf rétta flokka til að stýra ferlinu

Og sá flokkur er Framsókn.  Ekki spurning.  Enginn flokkur hefur unnið af eins miklum heilindum fyrir land og þjóð í gegnum árin og Framsókn og til að tryggja að spilling grafi ekki um sig á komandi árum þarf Framsókn að stýra ferlinu.

Við þurfum að tryggja það að t.d. ríkisbankarnir verði áfram í eigu hins opinbera til að tryggja að peningar flæði ekki til fólks sem við þekkjum ekki og gæti notað þá í eitthvað sem nýtist ekki þjóðinni.  Það þarf að tryggja að þeir sem fá að njóta kerfisins í framtíðinni muni skila sínu til ríkisins og landsins, og þá þarf að hafa sterkan flokk við völd sem getur valið réttu aðilana, vammlausa og dugmikla.

Svo þarf að sjálfsögðu að einkavæða ríkisbankana sem fyrst því það er óhugsandi að ríkið sjái um rekstur banka í vestrænu ríki.  Þá þarf að sjálfsögðu að ganga svo um hnútana að þeir sem við þeim taka séu aðilar sem við þekkjum og treystum, það væri fátt verra en að ríkið léti bankana í hendur aðila sem það ekki þekkir.

Hér skiptir því höfuðmáli að hafa sterka og skýra stefnu.  Bankana áfram í rikiseigu til að tryggja að þeir séu nýtti í þágu þjóðarinnar.  Annað væri glapræði.  Og í annan stað þarf að tryggja að þegar einkavæðingin fer fram, sem þarf að gerast fljótt, þá fari bankarnir til traustra aðila sem muni gæta hagsmuna þjóðar til sjávar og sveita.  

Kjörumhverfi fyrir spillingu

Athugasemdir

[Gestur H (IP-tala skráð) 8.11.2008 kl. 17:52]

Þessi Framsóknarbrandari fer að verða svolítið þreyttur hjá þér. Hverja ertu að reyna að espa?

Ég giska á að þú heitir ekki Jón og hafir aldrei kosið Framsókn. Hlustar líklega á Abba og áttir þér draum um að verða grínisti. Gætir verið kona um fimmtugt.

[Rödd sannleikans (IP-tala skráð) 9.11.2008 kl. 09:50]

Langt frá því að vera fyndinn, þessi framsóknarbrandari. Það sem er enn sorglegra, hins vegar, er að enginn flokkur er fær um að stýra okkar báti á land. Eigum við að nýta okkur þetta sögulega Obama-tækifæri og sækja um að verða 51. ríki USA? Kannski verða íslendingar ekki jafn mótfallnir slíku valdafsali og inngöngu í ESB (af hverju getur maður ekki sett inn ranghvolfandi í sér augunum broskall?????)

[Valsól (IP-tala skráð) 9.11.2008 kl. 09:59]

Er ekki í lagi með þig, Framsókn? Framsóknarflokkurinn á álíka mikla sök á því hvernig málum er háttað eins og Sjálfstæðisflokkur, þetta eru báðir gamlir spillingaflokkar.